Mi prome bendishon, mi yu Naendra a nase na aña 2007. Esta dushi tempu. Un eksperensha nobo.
Na mi yu su 5 pa 6 luna di edat ami komo mama a kuminsa ripará ku ora mi yama mi yu e no ta bira wak mi òf reakshoná riba zonidonan rondo di kas. Mi kasa, mama i tata a bisa mi “NO” e yu ta tende. Pero un kurason di intuishon di un mama ta keda semper algu pekuliar. Pesei na e momentu ei mi no a insistí pasobra tur hende na kas tabata bisa mi stop di imaginá kos ku no ta bèrdat.
Ku mi yu su 9 luna di edat e la hasi su prome test di oido na Consultatie Bureau. Einan nan a konstatá meskos ku ami tabatin lunas ta eksperensha. E yu no ta reakshoná riba ni’un zonido.
I si e yu reakshona mes por tabata puro konsidensha.
Asina e proseso a kuminsá. Mi mester a bai un KNO-arts ku na su turno a hasi diferente test di oido na e dòkter su ofisina mes i delaster mi yu a hasi su último test di oido na Sehos.
E resultado final di Sehos tabata ku mi yu tin pèrdida grandi di su oido.
Ku e informashon aki nos a haña e posibilidat pa na Mei 2009 bai Hulanda pa hasi mas tèst di oido etc. Na Hulanda nan a konfirmá e diagnóstiko. Mi yu tin hopi pèrdida di oido, kiermen e ta surdu. Ku e resultadonan den nos man nos a bin Korsou bèk.
November 2023, ku yudansa di KNO-Arts Dr. Rach i aprobashon di SVB, nos a wòrdu manda bèk Hulanda na pa e yu hasi un Cochleair Implant. Dòkternan a bisa nos si, ku nan no por a sigura nos ku e resultado di e operashon lo ta bai ta unu positivo pasobra yen aspekto tabata hunga un rol. Nos a wordu pone na altura di e diferente aspektonan. Mi kasa a kompaña i sostene ami i nos yu den tur e proseso aki.
Komo famia nos sigur a keda konfia Dios ku tur kos la sali bon. Loke ta masha remarkable pa nos tabata ku e dòkter ku tabata bai opera nos yu su nòmber ta Emmanuel. Emmanuel su nifikashon den beibel ta para pa “Dios ku Nos”. E dianan promé ku e operashon i tambe dia di operashon nos a pone tur nos konfiansa den Dios ku tur kos lo kana bon i ku e resultado lo tabata unu fruktífero.
Nos ta yama Dios danki pasobra enbèrdat e operashon a bai bon. Kasi mitar di December 2009 mi yu a haña sita pa e bai tèst e implant pa promé biaha. E promé reaskhon di mi yu ku su implant tabata unu masha bunita. Mi yu ta tende!!! Ki alegria mira reakshon di mi yu ora ami òf un otro hende yam’é òf hasi zonido. Nos tabata hopi kontentu.
Wel poko poko pero sigur mi yu tabata kustumbrá ku e implante. E tabata bistié tur dia un tiki e pa e kustumbrá. E tabata gusta bisti su aparato. Den 1 luna ya kaba e por a menshoná su promé palabra na hulandes “Paard” – Kabai. Nos tabata hopi kontentu mes ku e atenshon i guia ku e tabata haña na Hulanda. Nos a keda 8 luna na Hulanda pa su revalidashon i “nazorg” i na Juni 2010 nos a bin Kòrsou bek.
Na aña 2011 nos a haña nos di 2 bendishon, nos yu Jianthe. E temporada ei kosnan tabata mas moderno i ku 2 siman kaba babynan por a hasi tèst di oído. E resultado di Jianthe su test di oído a bai bon. Nos yu ta tende. Di mes nos tabata hopi kontentu ku esei. Pero lastimamente segun lunanan ta pasa e yu su oído tambe a bai atras i via di tèstnan na Sehos i despues Colombia a konstatá ku e yu ta surdu.
Awor nos mester a kana e mesun proseso ku nos prome yu. Nos tabata di mes hopi positivo i sigur tur kos a bai bon tambe ku e operashon di nos di dos yu. Wèl, ningun yu no ta meskos ku otro. Mi di dos yu a tarda un tiki mas tantu pa e la kustumbrá ku e aparato. Segun tempu ta pasa e la bin gusta bisti su aparato. E mes ta lanta mainta i bisti su aparato.
Di regreso na Korsou mi por bisa ku tur dos yu a haña un kaluroso bon bini i masha bon akogida na Skol Myrna Dovale. Tur 2 yu a haña/ta hañando e atenshon nesesario pa por a desaroyá nan habilidatnan lo máksimo posibel.
E aparato CI a duna tur dos yu sigur un balor agregá i ku nan desaroyo di habla sigur por a bai mas lihé i ku sigur ayudo na nivel di e dosentenan di Skol Myrna Dovale. Sigur mi ta hopi agradesido na kabes di skol, dosentenan i logopedistanan di Skol Myrna Dovale pa nan bon trabou. Bosnan ta i lo keda un famia pa nos semper.
Mi tin ku yama danki tambe na mi kasa ku a sa di “support” ami i nos yunan 100% den henter e proseso aki. Su “support” sigur a sa di hasi e proseso hopi mas leve. Mi kasa a sòru di a buska informashon, lesa etc i pone su mes bon na altura riba tur piesanan di e aparato etc. Hasta e la yega di yuda varios hende na Kòrsou ku nan aparato etc.
Un danki na un i tur ku por a yuda nos den e proseso aki.