Ya pa 5 aña Fundashon Alton Paas, Asosashon di Mayor Totolika, Fundashonnan Pro Bista i Fundashon Hèndikèp Ouditivo ta pone nan skouder huntu pa selebrá dia 3 di Desèmber “Dia Internashonal pa personanan ku un desabilidat”.
Meta di e selebrashon ta pa demostrá ku apesar ku nos personanan tin nan limitashonnan, nan kapasidat i talento ta nan Abilidat, i tambe pa duna e organisashonnan e oportunidat pa duna informashon tokante e trabou ku nan ta hasi i di e forma aki stimulá inklushon den nos komunidat.
E promé aña a organisá un transmishon nashonal di 6 ora largu na televishon. E siguiente aña a organisá un kaminata di Fòrti pa Brionplein na kual mandatarionan a eksperensha un desabilidat dor di a kore den ròlstul òf kana ku wowo tapá i hasiendo uso di otro medionan di yudansa. Na Brionplein a entregá e petishon na Gobièrnu pa bini ku un rampa na e Pergola. Durante e di tres selebrashon a inougurá e rampa i tabata tin un feria riba Brionplein, kaminda personanan ku un limitashon a mustra nan abilidatnan riba tereno di obra di man, masashi, traha meubel ku palèt, èts. E di kuater selebrashon tambe tabata un feria pero e biaha aki na Sambil.
E di sinku selebrashon tabata den edifisio di PWFC i e biaha aki e tabata un festival di show spesial di kanto i baile dor di diferente gruponan ku limitashon i tambe ta tin stèntnan pa kumpra artíkulo i haña informashon.
“Ban Selebrá Abilidat, sin importá nos diferensianan, paso nos abilidat lo trese unidat pa nos patria, pa nos avansá, progresá i prosperá.
