Un problema ku meresé atenshon
Basta ku un bebi ta salú i no tin problema ku su oído e ta siña outomátikamente komprendé i papia e idioma ku e ta tende rònt di dje.
Despues di sierto fasenan di idioma di bebi e proseso natural di desaroyo di habla ta kuminsá normalmente entre edat di 12 pa 18 luna.
Un mucha ku ta surdu lo no tin desaroyo di habla di su mes, E lo mester risibí enseñansa spesial pa muchanan surdu.
Ta ser balotá ku 0,15 te 0,20 porshento di tur mucha (unu di kada 500 te 700) lo mester di enseñansa pa muchanan surdu.
Ta papia di pèrdído di oido prelingual ora ku e pèrdida di oído ta presente promé ku e mucha a siña su idioma materno.
Di otro banda tambe tin pèrdida di oído postlingual, den kua kaso e persona to bira surdu despues ku su desaroyo di habla a kompletá. E por sigui papia normal, aunke el a pèrdè su oído pero hopi be e ta siña su mes komprendé hende, dor di wak na su boka (lesa lep).
Otro aspektonan
Tin diferente otro manera ku nos por klasifiká pèrdida di oído , dependiente di sierto aspektonan. Por ehèmpel e pèrdida di oído por ta leve, moderá òf severo.
E por ta reversibel (e por drecha) òf irreversibel (e no por drecha).
E por ta stashonario òf progresivo.
Tambe e por ta unilateral (un oreo só afektá) òf bilateral (tur dos orea afektá). Un pèrdida di oído bilateral ta hopi mas serio.
Un persona ku un pèrdida unilateral ta tende tur kos debí na su orea bon, solamente e fin difikultat di determiná e direkshon di zonidonan i e no por gosa di muzik steriofóniko, komo ku pa esaki e mester tin un bon oído bilateral.
Klasifikashon di perdida di oido segun su intensidat
• 20 – 40 dB: ——– Pèrdida di oido leve
• 40 – 60 dB: ——– Pèrdida di oido moderá
• 60 – 80/90 dB:—– Pèrdida di oido severo
• 90 dB: ————– Kasonan entre pèrdida di oído severo i sordera
• 105 dB òf mas:– Sordera